Mae tîm Blynyddoedd Cynnar Caerffili yn gweithio gyda theuluoedd, timau ymyrraeth gynnar, gweithwyr iechyd proffesiynol, lleoliadau gofal plant a chwarae cofrestredig, ysgolion a darpariaethau cymunedol i weld sut y gallwn ni gynorthwyo plant ag anghenion datblygu sy’n dod i’r amlwg orau.
Mae ein timau ymyrraeth gynnar yn gweithio mewn cymunedau gyda theuluoedd ar y cyfle cyntaf i gynorthwyo datblygiad iaith gynnar a datblygiad plant drwy sesiynau teulu unigol ar-lein neu wyneb yn wyneb yn ogystal â sesiynau grŵp gan gynnwys grwpiau iaith.
Mae ein tîm gofal plant yn gweithio’n agos gyda lleoliadau gofal plant a chwarae cofrestredig i ddatblygu darpariaeth gynhwysol, gan gynnwys arsylwi ar blant, strategaethau modelu rôl yn y lleoliad, cyflwyno hyfforddiant i dimau staff, yn ogystal â darparu adnoddau sydd eu hangen ar y plentyn i gael mynediad at yr amgylchedd gofal plant.
Mae llawer o gymunedau yn sefydlu eu grwpiau lleol eu hunain i gynorthwyo plant i chwarae yn y gymuned. Gallwch chi ddod o hyd i beth sydd ar gael trwy ddefnyddio Dewis. Yn ystod gwyliau’r haf, mae sesiynau Bwyd a Hwyl mewn ysgolion a Diwrnodau Chwarae yn y Parc i deuluoedd sy’n sesiynau cynhwysol ac sy’n gallu cynnig cyfleoedd chwarae gwych i blant a theuluoedd. Mae clybiau Sparkle hefyd ar gyfer plant ag anghenion ychwanegol mwy penodol.
Rydyn ni eisiau i bob plentyn ddod yn ddysgwr annibynnol sy’n hyderus ac yn ffynnu mewn amgylchedd dysgu llawn hwyl. Fodd bynnag, mae rhai plant yn cael trafferth gyda hyn ac mae angen cymorth mwy targedig arnyn nhw i’w helpu nhw i ymsefydlu a datblygu eu sgiliau annibyniaeth. Mae yn nodi plant y gallai fod angen y ddarpariaeth ychwanegol hon arnyn nhw.
Weithiau mae cymorth i gael mynediad at ddarpariaeth gofal plant wedi’i hariannu yn dibynnu ar gyllid neu sefyllfa eich teulu. Edrychwch ar y tudalennau gwe am ragor o wybodaeth a chysylltwch â ni os oes angen cymorth arnoch chi.
Cyn dechrau mewn lleoliad gofal plant gyda darpariaeth uwch, bydd y lleoliad yn trefnu cyfarfod pontio. Bydd y lleoliad yn eich gwahodd chi a gweithwyr proffesiynol eraill sy’n gweithio gyda chi i’r cyfarfod. Yn y cyfarfod rydych chi i gyd yn rhannu gwybodaeth i ddatblygu proffil un dudalen eich plentyn.
Mae’r Proffil Un Dudalen yn nodi cryfderau eich plentyn, yr hyn sy’n bwysig iddo a’r ffordd orau i’w gynorthwyo yn y lleoliad gofal plant. Mae’r lleoliad yn adolygu a diweddaru proffil un dudalen eich plentyn bob tymor. Mae gennym ni ddull camu i lawr (symud tuag at ddarpariaeth gyffredinol) wrth i’ch plentyn ddod yn fwy annibynnol ac wrth i’w sgiliau ddatblygu.
Os yw’ch plentyn yn gwneud cynnydd da, bydd y lleoliad yn gweithio gyda chi a’ch plentyn i gynllunio pontio i’r dosbarth Meithrin (Addysg y Blynyddoedd Cynnar).
Weithiau, ni fydd plant yn gwneud cynnydd gyda’r ddarpariaeth ychwanegol yn y lleoliad gofal plant. Mae hyn yn rhan o’n hymateb graddedig. Os na fydd plant yn gwneud cynnydd, bydd trafodaeth aml-dîm ym Mhanel Anghenion Dysgu Ychwanegol y Blynyddoedd Cynnar a fydd yn cynnwys:
Bydd gweithwyr proffesiynol yn trafod hyn gyda chi. Byddan nhw’n trefnu cyfarfod cynllunio sy’n canolbwyntio ar unigolion (PCP) ar eich cyfer chi a’r holl weithwyr proffesiynol sy’n gweithio gyda’ch plentyn. Mae pob un yn rhannu gwybodaeth i weld a oes gan eich plentyn Anghenion Dysgu Ychwanegol (ADY). Mae eich meddyliau, eich dymuniadau a’ch teimladau chi yn bwysig drwy’r broses i gyd, ac yn y cyfarfod PCP. Mae hyn yn rhan o Ddeddf Anghenion Dysgu Ychwanegol a’r Tribiwnlys Addysg (Cymru) 2018 newydd.
Mae’r Ddeddf Anghenion Dysgu Ychwanegol a’r Tribiwnlys Addysg (Cymru) 2018 yn cynnig system gynhwysol. Ei nod yw diwallu anghenion pob plentyn i ddod yn llwyddiannus, annibynnol a gwydn. Mae’n caniatáu i blant a rhieni fod yn ganolog i’r cynllunio. Mae cymorth i gymryd rhan cymaint â phosibl yn y broses gwneud penderfyniadau.
Mae’r cyfarfod Cynllun Datblygu Unigol yn rhannu’r wybodaeth sydd ei hangen i benderfynu a oes gan eich plentyn Anghenion Dysgu Ychwanegol. Os oes gan eich plentyn Anghenion Dysgu Ychwanegol, bydd yr wybodaeth sy’n cael ei rhannu’n cael ei ddefnyddio i ddatblygu Cynllun Datblygu Unigol eich plentyn. Mae’r Cynllun Datblygu Unigol yn cynnwys y Ddarpariaeth Ddysgu Ychwanegol sydd ei hangen. Mae darpariaeth ddysgu ychwanegol yn gymorth sy’n ychwanegol at yr hyn sy’n cael ei ddarparu i’r mwyafrif o blant yr un oedran. Mae adolygiadau o CDU yn digwydd yn flynyddol, os nad ydyn nhw’n gwneud cynnydd, neu pan fydd unrhyw beth arwyddocaol yn newid iddo.
Os bydd anghytundebau yn ystod y broses, bydd y bobl allweddol yn dod at ei gilydd i geisio cytundeb. Mae gennych chi hawl i apelio yn erbyn penderfyniadau sy’n cael eu gwneud gan yr ysgol neu’r Awdurdod Lleol ynghylch ADY eich plentyn neu’r DDdY. Apêl yw pan fyddwch chi’n gofyn i benderfyniad gael ei newid. Bydd cymorth annibynnol yn gallu gwrando a helpu os bydd anghytundebau o hyd. Mae SNAP Cymru yn cynnig cyngor a chymorth annibynnol.
Mae gan rai plant anghenion meddygol corfforol cymhleth ac mae angen rhagor o ddarpariaeth gofal plant arbenigol arnyn nhw. Bydd plant sy’n gymwys ar gyfer lleoliad gofal plant sy’n cael ei ariannu drwy’r rhaglen Dechrau’n Deg ac sydd angen gofal plant arbenigol yn cael lle drwy’r Panel Anghenion Dysgu Ychwanegol yn seiliedig ar y dystiolaeth wedi’i darparu. Ar hyn o bryd, mae rhai lleoliadau gofal plant Dechrau’n Deg arbenigol yng Nghylch Chwarae Dechrau’n Deg Sunshine yng Nghanolfan Plant Caerffili yn Eneu’r-glyn a lleoliadau gofal plant penodol ledled y Fwrdeistref Sirol sy’n gallu cyflwyno darpariaeth arbenigol.
Nod Deddf Anghenion Dysgu Ychwanegol a’r Tribiwnlys Addysg (Cymru) 2018 a’r Cod Anghenion Dysgu Ychwanegol yw gwneud darpariaeth addysg yn fwy cynhwysol i holl blant Cymru drwy ddarparu’r system statudol ar gyfer diwallu anghenion plant ag anghenion dysgu ychwanegol (ADY).
Mae adran 2 o’r Ddeddf yn diffinio’r term ‘anghenion dysgu ychwanegol’ (ADY):
2 Anghenion Dysgu Ychwanegol
(1) Mae gan berson anghenion dysgu ychwanegol os oes ganddo anhawster dysgu neu anabledd (pa un a yw’r anhawster dysgu neu’r anabledd yn deillio o gyflwr meddygol ai peidio) sy’n galw am ddarpariaeth ddysgu ychwanegol.
(2) Mae gan blentyn sydd o’r oedran ysgol gorfodol neu berson sy’n hŷn na’r oedran hwnnw anhawster dysgu neu anabledd—
(a) os yw’n cael anhawster sylweddol fwy i ddysgu na’r mwyafrif o’r rhai eraill sydd o’r un oedran, neu
(b) os oes ganddo anabledd at ddibenion Deddf Cydraddoldeb 2010 sy’n ei atal neu’n ei lesteirio rhag defnyddio cyfleusterau addysg neu hyfforddiant a ddarperir yn gyffredinol ar gyfer eraill sydd o’r un oedran mewn ysgolion prif ffrwd a gynhelir neu sefydliadau prif ffrwd yn y sector addysg bellach.
(3) Mae gan blentyn sydd o dan yr oedran ysgol gorfodol anhawster dysgu neu anabledd os yw’r plentyn yn debygol o fod o fewn is-adran (2) pan fydd o’r oedran ysgol gorfodol, neu y byddai’n debygol o fod felly pe na bai darpariaeth ddysgu ychwanegol yn cael ei gwneud.
(4) Os yw’r iaith (neu’r ffurf ar iaith) y mae neu y bydd person yn cael ei addysgu ynddi yn wahanol i iaith (neu ffurf ar iaith) sy’n cael neu sydd wedi cael ei defnyddio gartref, nid yw hynny’n unig yn golygu bod gan y person anhawster dysgu neu anabledd.
Dilynwch ni